夢見地震！因為睇得多傳聞？
- Dr. Canis Lin
- Feb 23
- 3 min read
Updated: Mar 14
踏入了2026，回望過去，唔知道去年你有沒有受到某漫畫疑似地震的預言所影響呢？
夢者Edward （化名）去年發了一個地震夢，佢懷疑自己睇得多這些傳聞，可能“日有所思、夜有所夢”？！
根據心理學研究，夢是多意義性的 -- 即是一個夢境可以包含多個層面，包括反映個人層面（身體、心理、解決問題、和自己的關係、和別人的關係等等）、文化層面、靈性層面及集體潛意識層面。
我通常會鼓勵夢者先從個人層面去探索一下。
Edward分享：“我夢見地震呀！我同阿仔響屋企，突然間地震，成座樓傾斜咗，好驚呀！震完之後，發現大家無事喔！好神奇呀！成座樓傾斜咗，諗緊點樣落到地下，就醒咗啦！”
解夢通常我都會先問夢者夢中感覺，就算佢講個夢時已經講過，因為好多時夢者在分享的過程中可能會有更多感覺浮現。
Edward: “而家諗諗下其實又唔係好驚咋喔！”；
Canis：“夢中屋企係幾多樓呢？”；
Edward：“18樓”；
Canis好奇：“你阿仔今年幾多歲呢？”；
Edward：“18歲”；
從過去的解夢經驗，這部分似乎有d關係。不過我沒有直接問，想俾多d空間繼續探索一下先。
Canis：“2018年或者18年前、又或者同18相關的日子有沒有一些像是地震，令你驚的情況出現過呢？”
Edward：“Er。。。無喔！2018年？無喔！Er。。。18年前？我幾多歲呢？好似無喔！。。。好彩我間唔中會寫下日記（大事記），等我search 下先”；
觀察著Edward 努力在手機搜索，突然。。。
Edward毛管棟到不得了！（留意Edward 的身心反應！）
“嘩！好神奇呀！一搵睇到我本“大事記”寫住“2018年8月18日”。。。果日係阿仔做大手術日子！！！唔怪得之覺得地震咁驚啦！嘩！我真係已經唔記得咗係幾時發生！好神奇呀！”；
我都即時毛管棟！原來18係個年份，又係個日子！ “雖然你意識層面唔記得，但潛意識什麼也記得呢！至於點解已經事過境遷，仲會發呢個夢呢？可以留意一下你呢段時間有沒有相似的“驚”既感覺呢？可能係同阿仔相關的！”
Edward：“嘻嘻！我估都可能同阿仔有關！雖然佢都好似大個仔咁，18歲啦！大人啦！但係我都有好多嘢唔放心！特別係最近佢遇上。。。（下刪3千字）”；
Canis：“都明白家長可能會有此情況！係一個好重要的學習過程，學習放心。。。和放手！要相信阿仔係有能力去處理佢自己的情況，如果唔係，佢內心可能會覺得你係否定佢的能力，但又未必會表達俾你知！”
Edward：“係囉！真係好難放手啊！不過都要試下，如果唔係自己內心成日地震都好辛苦！”
Canis：“你願意試試都係好事啊！另外，你個夢可能都溫馨提示你要多d grounding，避免諗太多～諗歪咗（夢中座樓傾斜了！）。再加上夢中你“諗緊點樣落到地下”，避免諗太多（18樓層的高度可以象徵思想世界），而且你個夢地震完係無事，仲覺得好神奇添！可能潛意識的智慧想提你你的“諗太多”其實結果都係會無事既！你覺得呢？”
Edward：“嘻嘻！我都係會成日胡思亂想，有好多擔心既人黎既！都係要改改佢！”
當我們可能會擔心自己的“地震夢”係對外在世界的預言時，我會鼓勵大家探索一下同自己內心世界相關的情況先。畢竟內在正向的轉變，也可能對外在產生正向的變化。與其過度擔心，不如做多d grounding （接地練習），令內心容易平靜安穩下來吧！
解夢秘笈：
1. 解夢很重要的一步係留意夢中及夢醒後的情緒，因為這些情緒通常反映生活中需要照顧的感受和內心需要；
2. 夢中出現的數字也是很好的解夢線索，可以象徵年份、日子、年齡、門牌號碼、地址等等各式各樣跟夢者相關的“潛意識密碼”；
3. 鼓勵大家從夢境發掘解決方法，例如Edward的夢就溫馨提示佢可以多做Grounding 接地練習去照顧“驚”或“過度擔心”的情緒！
解夢係一種很好的自我了解活動，有時甚至可以從夢境搵到解藥㗎！
學識從心理學角度解夢，掌握助己助人的好方法！
*如果您覺得呢個post幫到您和身邊朋友，歡迎您like n share俾更多有需要的人啊！Thank you!
Comments